Für alle, die’s lieber schriftlich mögen:

gwüssi mensche chönd wähle und stimme,
gwüssi mensche hend kei stimm für die wahlä,
gwüssi mensche sind linkshänder aber wähled rechts,
gwüssi mensche sind rechtshänder aber handlet link,
gwüssi mensche sind beidhändig und handlet recht,
gwüssä sind beidi händ bundä und sie wähled links,
gwüssi mensche hend wiitsicht, anderi sind churzsichtig,
gwüssi planned uf churzi sicht, anderi sind wiitsichtig,
gwüssi mensche setzed uf öpfel anderi lieber uf fenschter,
gwüssi mensche setzed sich as fenster und essed en öpfel,
gwüssi mensche halted sich as gsetz, anderi setzed sich es ghalt,
gwüssi mensche träumed vomne andere lebe, anderi lebed gnau dä traum,
gwüssi mensche sind schwizer mit papier,
gwüssi mensche sind ohni schwizer papier,
gwüssi mensche sind papierschwizer,
und gwüssi mensche sind i dä schwiiz ohni papier,
gwüssi mensche wönd kei schwizer papier,
gwüssi hetted besser kei schwizer papier,
gwüssi mensche chaufed schwizer papier,
und gwüssi schämed sich fürs schwizer papier,

jede mensch isch mol inländer mol usländer, je nochdem woner gad isch,
jede mensch isch ziemli schnell kriminell, je nochdem was ihm passiert,
jede mensch isch teils dame teils herr, drum mol dämlich mol herrlich,
jede mensch no so verliebt, cha hass schüre, jede mensch no so hässig cha liebi spüre,
jede mensch mue schnuufe, esse, trinke, schisse, pisse, schlofe, nüsse, hueste görpse furze,
jede mensch isch döt dihai woner da alles cha mache und sich somit heimisch fühlt,
jede mensch isch durchsetzt vo initiative, jede schriber setzt sich durch menschlichi initiative,
jede mensch, wo menschlich isch, stimmt nei, bi dere durchsetzigsinitiative,
jede mensch het ä stimm, doch stimmed nöd alli ab,
jede mensch isch einzigartig, und doch simmer alli eis, nämli mensche…
jede mensch wo hinderfrogt wird verdächtigt, doch dä verdacht verhinderet d’frog, drum
hinderfroged alles und blibed verdächtig…

Und das noch, pünktlich zum Schlussspurt: