Verdächtig #10: z’vill Salz

Hier die Kolumne zum Nachlesen:

i parkier nochme strenge morge bi dä migros im linsebüel uf so gellä chrüz. Bi vilicht zwei minute weg gsi, chume wieder zum auto zrugg, stieg i und wöt losfahre… do chunt ä politesse uf mi zue und fangt mi aa zämeschisse.

Welli bim schaffe immer französischs radio losä, bin i im frenchflow und gib ihre uf französisch antwort! Do flippt sie richtig us und schreit mi aa: da gäng doch nöd, eifach do parkiere und denn chöni d’sproch au nöd, da seg ä frechheit. So chönmer sich doch nöd verhalte, wani do überhaupt machi, inere Region woni d’sproch nöd chön…

naja irgendwenn ischs mer z’bunt worde, und i ha dä motor aaloh und bin devogfahre… dihai ischmer da nomol dur dä chopf, und i han öpis ufgschriebe…

I leb imne land do gits offiziell 4 sproche,
Doch mängisch schints mer sinnlos wie en alki mit bier strofe,
Als bilingue hesch es streng, so wie en stierchnoche,
Bim bullekampf i dä arena, wird jede stier broche,
Doch d’sproch fiire, da machet eher wenigi,
Debi sind sproche extrem wertvoll, vom everest bis zum Rigi
Öb aldi, lidl, denner, spar, manor, coop oder migi,
Mini lüt verständiget sich überall und teilet aumol ä zigi,
Doch mängi lüüt flipped us, wenns eim nöd gad verstönd,
Denn fühl mi voll beschisse, und hoff dass sie mini Stadt verlönd,
Vieli sind vom Geld meh als aber vo Intelligenz eher nöd so verwöhnt,
Drum gits au do diskriminierige weg sproche, wo nöd so schnell vergönd.
Jede vertuet sich mol und nimmt bim choche z’viel salz,
doch mer sind ä willensnation au dank dä Sprochevielfalt
Drum liebe Samichlaus da isch min letschte wunsch,
Mach dass es möglichscht bald i dä ganze schwiz besser chunt.